Terapia hormonale në QSUT për personat transgjinorë, Këshilli Ndërfetar i Shqipërisë: Duhet transparencë! Të bëhet publike baza shkencore, ligjore dhe etike

Këshilli Ndërfetar i Shqipërisë ka reaguar lidhur me urdhrin e Ministrisë së Shëndetësisë “Për trajtimin hormonal të personave transgjinorë”, që hap për herë të parë mundësinë e kryerjes së kësaj terapie në shërbimin publik shëndetësor në vend. Në një deklaratë publike, Këshilli Ndërfetar thekson se çështjet e tilla, për shkak të ndikimit të tyre shoqëror, etik, mjekësor dhe antropologjik, kërkojnë transparencë institucionale, konsultim profesional dhe debat publik të informuar. Këshilli kërkon që institucionet përgjegjëse të publikojnë bazën shkencore dhe mjekësore të udhëzuesit, arsyetimin shkencor, mjekësor dhe etik për miratimin e tij me procedurë të përshpejtuar, bazën juridike dhe kompetencat ligjore që mbështesin urdhrin dhe kriteret mbi përfshirjen e personave të mitur në këtë trajtim. Gjithashtu, KNFSH kërkon sqarime mbi bazën juridike që lejon personelin mjekësor të aplikojë trajtime hormonale për personat transgjinorë, duke pasur parasysh mungesën e një kuadri ligjor të detajuar për këtë kategori. Bordi i Presidencës thekson gjithashtu se, sipas mësimeve dhe traditave të komuniteteve fetare që përfaqëson, identiteti njerëzor dhe dallimi mes burrit dhe gruas konsiderohen pjesë të natyrës njerëzore të dhënë nga Zoti. Reagimi i Këshillit Ndërfetar të Shqipërisë: Mbi Udhëzuesin e Praktikës Klinike “Për trajtimin hormonal të personave transgjinorë”. Këshilli Ndërfetar i Shqipërisë ka ndjekur me vëmendje miratimin e Udhëzuesit të Praktikës Klinike “Për trajtimin hormonal të personave transgjinorë”, të miratuar me Urdhrin nr. 304, datë 28.04.2026, të Ministrisë së Shëndetësisë dhe Mirëqenies Sociale. Në respekt të rendit kushtetues të Republikës së Shqipërisë, dhe të kompetencave të institucioneve publike në fushën e shëndetësisë, Këshilli Ndërfetar i Shqipërisë vlerëson se çështje të kësaj natyre, për shkak të ndikimit të tyre shoqëror, etik, mjekësor dhe antropologjik, kërkojnë transparencë të plotë institucionale, konsultim të gjerë profesional dhe debat publik të informuar. Në funksion të mbrojtjes së interesit publik, Këshilli Ndërfetar konsideron se çdo protokoll apo ndërhyrje mjekësore me pasoja potencialisht afatgjata fizike, psikologjike dhe sociale duhet të mbështetet mbi standarde të qarta shkencore, bazë të qëndrueshme juridike dhe procedura transparente vendimmarrjeje, në përputhje me parimet kushtetuese të proporcionalitetit, sigurisë juridike dhe mbrojtjes së shëndetit publik. Për këtë arsye, Këshilli Ndërfetar kërkon që institucionet përgjegjëse të bëjnë publike: – Bazën shkencore dhe mjekësore mbi të cilën është hartuar ky udhëzues; – Arsyetimin shkencor, mjekësor dhe etik që justifikon miratimin me procedurë të përshpejtuar të këtij urdhri; – Bazën juridike dhe kompetencat ligjore mbi të cilat mbështetet miratimi i tij; – Arsyetimin dhe kriteret mbi të cilat është përfshirë edhe kategoria e personave të mitur në këtë rregullim. Këshilli Ndërfetar vlerëson gjithashtu se kërkon sqarim publik edhe baza juridike mbi të cilën personeli mjekësor autorizohet të aplikojë trajtime hormonale për personat transgjinorë, duke qenë se legjislacioni shqiptar aktual nuk parashikon një kuadër të posaçëm ligjor që rregullon në mënyrë të detajuar statusin juridik, kriteret klinike, procedurat mjekësore dhe standardet e trajtimit për këtë kategori personash. Duke pasur parasysh natyrën komplekse dhe pasojat afatgjata mjekësore, psikologjike dhe sociale të trajtimeve hormonale, Këshilli Ndërfetar vlerëson se është i nevojshëm një debat i gjerë kombëtar dhe konsultim multidisiplinar me ekspertë të mjekësisë, bioetikës, psikologjisë, të drejtës dhe përfaqësues të shoqërisë civile, me qëllim garantimin e transparencës, sigurisë juridike dhe besimit publik me përgjegjësi institucionale, gjuhë etike dhe respekt për dinjitetin e çdo personi. Këshilli Ndërfetar i Shqipërisë rithekson se, në përputhje me mësimet dhe traditat e Komuniteteve fetare që përfaqëson, identiteti njerëzor dhe dallimi ndërmjet burrit dhe gruas konsiderohen pjesë themelore e natyrës njerëzore të dhënë nga Zoti. Në këtë kuptim, shprehim rezervat dhe shqetësimin ndaj ndërhyrjeve mjekësore apo praktikave që synojnë ndryshimin artificial të karakteristikave gjinore biologjike, duke vlerësuar se procedura të tilla prekin konceptin natyror të personit njerëzor dhe të familjes, sipas traditës fetare dhe vlerave mbi të cilat është ndërtuar shoqëria jonë. Misioni ynë mbetet angazhimi për mbrojtjen e dinjitetit njerëzor, të familjes, të rendit moral dhe të interesit publik, duke bërë thirrje për përgjegjësi institucionale, transparencë dhe respekt ndaj vlerave themelore njerëzore e shoqërore. Bordi i Presidencës KNFSH © GjeneralKapteri Te lidhura Terapia hormonale në QSUT për personat transgjinorë, Këshilli Ndërfetar i Shqipërisë: Duhet transparencë! Të bëhet publike baza shkencore, ligjore dhe etike Rahim Stërling në telashe, e arreston policia! Ja për çfarë dyshohet Marrëveshja me Iranin, Trump vendos kushtet: S’do të ketë dakordësi nëse nuk respektohen “vijat e kuqe” të SHBA-së Teksti politik më i rëndësishëm na vjen nga Papa Parashikimi i motit për këtë të shtunë, reshje të dobëta shiu në jug gjatë pasdites! Ja sa do të arrijnë temperaturat

Terapia hormonale në QSUT për personat transgjinorë, Këshilli Ndërfetar i Shqipërisë: Duhet transparencë! Të bëhet publike baza shkencore, ligjore dhe etike

Related

Dhunimi ndaj protestuesit në Zvërnec, Gjykata lë në “Arrest në burg” truprojën e firmës private, Geraldo Biba

Dyshimet për tjetërsimin e pronave në Zvërnec, SPAK urdhëron kontrolle në Tiranë dhe Vlorë! Në ‘sitë’ ish avokati Pëllumb Petritaj dhe Redi Struga

Pagat bruto vjetore, Shqipëria renditet në fund të listës me 10 mijë euro në vit, sa një e pesta e Europës

Trajtimi hormonal i personave transgjinorë, Këshilli Ndërfetar kërkon transparencë dhe debat të gjerë publik