Kulla e Turanit, ndërhyrje restauruese për të ndalur degradimin e monumentit me rëndësi historike dhe arkitektonike

Nga Julia Vrapi Kulla e Turanit, një monument i rëndësishëm kulture me vlera të veçanta historike dhe arkitektonike, po i nënshtrohet një ndërhyrjeje të gjerë restauruese për shkak të dëmtimeve të grumbulluara me kohë, me qëllim ruajtjen, por edhe promovimin e saj si një atraksion kulturor dhe turistik. Ndërhyrjet në këtë kullë, një prej monumenteve më të veçanta të trashëgimisë kulturore në juglindje të Shqipërisë, janë të financuara nga fondi i Ministrisë së Kulturës, Turizmit dhe Sportit për rastet emergjente. Ministri i Turizmit, Kulturës dhe Sportit, Blendi Gonxhja inspektoi punimet për restaurimin e Kullës së Turanit, monument kulture i kategorisë së parë. Për këto ndërhyrje ministri Gonxhja shprehet se përveç shpëtimit të monumentit, synohet edhe rivitalizimi i tij si pjesë e itinerareve turistike dhe kulturore, duke ruajtur vlerat dhe autenticitetin për brezat e ardhshëm. “Vijojnë punimet për restaurimin dhe konsolidimin e Kullës së Turanit, një monument me rëndësi të veçantë historike dhe arkitektonike, i përfshirë në listën e objekteve në risk të DRTK Korçë. Ndërhyrjet, të financuara nga fondi i MTKS për rastet emergjente, përfshijnë konsolidimin e muraturave, trajtimin e çarjeve, restaurimin e kupolës dhe çatisë, si dhe përmirësimin e mbrojtjes nga lagështira. Krahas shpëtimit dhe stabilizimit të monumentit, synohet edhe rivitalizimi i tij si pjesë e itinerareve turistike dhe kulturore të zonës, duke ruajtur autenticitetin dhe vlerat e tij historike për brezat e ardhshëm”, shprehet ministri Gonxhja për ndërhyrjen që po vijon në Kullën e Turanit. Kulla e Turanit është një kullë karakteristike, e ndërtuar në skajin lindor të fshatit Turan, ndërsa punimet restauruese nisën pas shqetësimeve të ngritura muaj më parë për gjendjen e amortizuar të saj. Kulla monument kulture Kjo kullë është një dëshmi e shquar e arkitekturës së fortifikuar dhe ka një histori thelbësore, që shtrihet në kohën e lashtë. Kulla ka një planimetri katrore me përmasa të vogla dhe një ambient në çdo kat, duke theksuar funksionin e saj të përqendruar kryesisht në mbrojtje. Volumi i mbyllur, strehët e gurta të pazhvilluara dhe mungesa e dritareve flasin për karakteristikat e një objekti të ndërtuar kryesisht për qëllime mbrojtëse. Me një sipërfaqe prej 46,575 m2 dhe dimensione 6.75 x 6.9 m, kulla ka një lartësi prej 15 metrash, ndërsa ndërhyrja restauruese që po vijon synon ruajtjen e origjinalitetit dhe forcimin strukturor të monumentit.

Kulla e Turanit, ndërhyrje restauruese për të ndalur degradimin e monumentit me rëndësi historike dhe arkitektonike

Related

“Nga lira e lashtësisë drejt teatrit lirik”, koncert-konferencë në muzeun Arkeologjik në Tiranë

Baleti “Radian”, një krijim i ri koreografik vjen si premierë botërore, ku lëvizja, muzika dhe hapësira skenike…

Bylis, mblidhet Komiteti Drejtues i projektit të BE-së për zhvillimin e turizmit me në fokus trashëgiminë kulturore

Gërmimet arkeologjike sjellin të dhëna të reja për zhvillimin e Scampis në shekujt V-VI