“Nga lira e lashtësisë drejt teatrit lirik”, koncert-konferencë në muzeun Arkeologjik në Tiranë

Koncert-konferenca “Nga lira e lashtësisë drejt teatrit lirik”, pjesë e edicionit XVI të ciklit “Takimet Muzikore të Dy Botëve”, në mjediset e Muzeut Arkeologjik u mbajt në bashkëpunim mes Akademisë së Shkencave të Shqipërisë, shoqatës “Argjiro” dhe ILS Academy. Protagonist i mbrëmjes ishte kompozitori dhe studiuesi i Akademisë së Athinës, dr. Nikos Xanthoulis, i cili interpretoi një program të pasur, ku u ndërthurën krijime të autorëve antikë me kompozime moderne të frymëzuara nga tradita klasike. Publiku dëgjoi pjesë si “Choral”, nga “Oresti” i Euripidit (408 p.K.); “Paeani delfik” i Athenaeus (128 p.K.), si dhe “Epitafi i Seikilosit” (shek. II-III e.s.), një nga dëshmitë më të hershme të muzikës së shkruar. Programi përfshiu gjithashtu krijime të Xanthoulis-it si “Rosa Ritrovata”; “Hear my Prayer” dhe “Honor to Dionysus”, duke u pasuruar me interpretimet e veprave të Handel, Bach, Luiz Bonfá dhe Garry Judd. Kombinimi i muzikës antike me kompozime baroke e moderne krijoi një urë mes kulturave dhe epokave, duke e bërë koncertin një përvojë të veçantë për publikun e pranishëm. Nëpërmjet muzikës, rrëfimit dhe kërkimit shkencor, dr. Xanthoulis solli jo vetëm tingujt e lirës me shtatë tela, por edhe historinë e saj, nga roli në qytetërimin antik deri te ndikimi në traditën e teatrit lirik dhe muzikës së kultivuar europiane. Në faqen e Akademisë së Shkencave thuhet se ky aktivitet, i organizuar nga Shoqata “Argjiro”, u mirëprit si një ngjarje që ndërthur artin me shkencën, duke i dhënë publikut shqiptar mundësinë të prekë nga afër një pjesë të gjallë të trashëgimisë kulturore universale.

“Nga lira e lashtësisë drejt teatrit lirik”, koncert-konferencë në muzeun Arkeologjik në Tiranë

Related

Baleti “Radian”, një krijim i ri koreografik vjen si premierë botërore, ku lëvizja, muzika dhe hapësira skenike…

Bylis, mblidhet Komiteti Drejtues i projektit të BE-së për zhvillimin e turizmit me në fokus trashëgiminë kulturore

Gërmimet arkeologjike sjellin të dhëna të reja për zhvillimin e Scampis në shekujt V-VI

“Zëri im ka vend”, një shfaqje që vendos në qendër fëmijët dhe përcjell mesazhe në teatrin Metropol